Олоҥхо саха омук былыыр былыргы дьыллар быыстарыттан сырдык уонна хараҥа, айыы уонна абааһы аймахтара утарыта турууларын, киирсиилэрин туһунан уостан уоска бэриллэн кэлбит уус – уран айымньыта. Олоҥхо киһи өркөн өйүн күүһүн күдэҕин кыаҕынан айыы аймаҕын күөмчүттэн көмүскүүр үрдүк аналын хоһуйар.

2005 сыллаахха сэтинньи 25 күнүгэр ЮНЕСКО  олоҥхону аан дойду култууратын биир саамай чаҕылхай шедеврынан биллэрбитэ.

Нөнүө сылыгар Саха Өрөспүүбүлүкэтин бэрэсидьиэнин 2006 сыл сэтинньи 15 күнүнээҕи  №3036 Ыйааҕынан Саха Өрөспүүбүлүкэтигэр сэтинньи 25 күнэ Олоҥхо күнэ быһыытынан биллэриллибитэ.

Олоҥхо декадатын чэрчитинэн олоҥхону киэн аранаҕа тарҕатар, үйэтитэр соруктаах тэрээһиннэр чэрчилэринэн Арыылаахтааҕы «Эйгэ» сынньалан киин, И.И.Артамонов аатынан библиотека коллективтара «Кэнчээри» оҕо тэрилтэтин  иитиллээччилэригэр, Орто – Эбэ коррекционнай интернат оскуолатын үөрэнээччилэригэр С.Васильев «Эмньик кулун аттаах Эрчимэн Бэргэн» олоҥхотуттан быһа тардыыны куукуланан оонньоон көрдөрдүлэр.  Салгыы «Балыксыт» диэн сахалыы оонньууга көхтөөхтүк кыттан күрэхтэстилэр.

Библиотека ааҕааччыларыгар олоҥхо дьыктаанын суруттардылар.