Арыылаах бөһүөлэгин И.И.Артамонов аатынан библиотекатыгар сылдьан дьиэни – уоту көрдүлэр, үлэни билистилэр. Ол кэннэ Бэйдиҥэтээҕи А.П.Петров аатынан норуот айымньытын киинигэр мустубут оҕолорго библиотечнай уруок ыыттылар. «Ааҕар балаҕантан саҕыллан куйаар ситимигэр» дириҥ ис хоһоонноох быыстапка кэлбит дьон болҕомтотун татта.

«100 сыл кэрэни, сырдыгы саҕан» тематическай биэчэргэ ыҥырыылаах ыалдьыттар, нэһилиэк олохтоохторо, үөрэнээччилэр кыттыыны ыллылар. Улуус кииннэммит библиотекатын тиһигин директора И.Д. Копырин библиотека ветеран үлэһиттэригэр Мария Николаевна, Агит Никоновтарга эҕэрдэ суруктары, бииргэ үлэлэһэр нэһилиэк тэрилтэлэригэр махтал суруктары туттартаата. Өлтөх нэһилиэгин баһылыга  К.А. Алексеев Мария Николаевна 75 сааһынан «Өлтөх нэһилиэгин культура сайдыытыгар кылаатын иһин» бэлиэни мустубут дьон ытыһын тыаһынан доҕуһуоллатан үөрүүлээх быһыыга – майгыга туттарда. Тэрилтэ салайааччылара Мария Николаевнаҕа юбилейнай сааһынан, нэһилиэк библиотекардарыгар эҕэрдэ суруктары, сэмэй бэлэхтэри туттардылар. Дьоро күнү эҕэрдэ номердар киэргэттилэр.

Библиотека улэһиттэригэр кэлэн ыалдьыттаан, биир бэлиэ күнү бэлэхтээбиттэригэр махталбытын тиэрдэбит.